Հայաստանի II միջազգային բժշկական համագումարը

2007 թ. հունիսի 28-30-ը Երևանի «Արմենիա-Մարիոթ» հյուրանոցում ՀՀ առողջապահության նախարարության հովանավորության ներքո տեղի ունեցավ Հայաստանի երկրորդ միջազգային բժշկական համագումարը։

Այս համագումարների անցկացման արմատները հասնում են նախորդ դարի յոթանասունական թվականները, երբ աշխարհասփյուռ հայության բժշկական սերուցքը առաջին անգամ փորձեց համախմբել հայ բժիշկներին` կազմակերպելով համահայկական բժշկական գիտաժողով։ Այդպիսի առաջին համագումարը անցկացվեց այն ժամանակ քաղաքացիական պատերազմի մեջ գտնվող Բեյրութում 1974 թ.։ Եվ, չնայած բազմաթիվ դժվարությունների, համագումարը կարողացավ համախմբել հայ բժիշկներին` դառնալով երկարատև համագործակցության ու բարեկամության ամուր հիմնաքար։ Հենց այս համագումարից սկսած յուրաքանչյուր չորսը տարին մեկ հաճախականությամբ նմանատիպ համագումարներ էին անցկացվում աշխարհի տարբեր անկյուններում։ Բնական է, որ Հայաստանի անկախացումից հետո պետք է հարց բարձրանար այս համագումարները Հայաստանում անցկացնելու վերաբերյալ։ Այդպիսի որոշում կայացվեց 2001 թ., և 2003 թ. Երևանում հաջողությամբ մեկնարկեց Հայաստանի առաջին միջազգային բժշկական համագումարը։ Այս տարի արդեն Հայաստանում էին 2007 թ. միջազգային համագումարի` սփյուռքից ժամանած ավելի քան երկու հարյուր մեր գործընկերները, որոնք ներկայացնում էին ԱՄՆ-ի, Անգլիայի, Ավստրալիայի, Արգենտինայի, Բելգիայի, Գերմանիայի, Իրանի, Լիբանանի, Կանադայի, Հունգարիայի, Շվեյցարիայի, Չեխիայի, Ռումինիայի, Ռուսաստանի, Սիրիայի, Ֆրանսիայի և մի շարք այլ երկրների գիտական ներուժն ու փորձը։ Այս համագումարին ակտիվորեն մասնակցեցին նաև Լեռնային Ղարաբաղից ժամանած շուրջ չորս տասնյակ բժիշկներ։

Համագումարի գիտական ծրագրի շրջանակներում Հայաստանի և սփյուռքի մասնագետների կողմից ներկայացվեցին շուրջ 480 գիտական նյութեր, որոնք ընդգրկվեցին Հայաստանի երկրորդ միջազգային բժշկական համագումարի գիտական նյութերի ժողովածուի մեջ։

Համագումարի շրջանակներում առաջին անգամ անցկացվեցին 10 սատելիտային սիմպոզիումներ և սեմինարներ, որոնց մասնակցեցին Երևանի և ՀՀ մարզերից հրավիրված ավելի քան 1500 բուժաշխատողներ։

Սիմպոզիումներ անցկացվեցին հետևյալ թեմաներով` ակնաբուժություն, օսթեոպորոզ, նյարդաբանություն, անեսթեզիոլոգիա, բուժքույրական գործ, ինչպես նաև սեմինարներ` ինվազիվ սրտաբանություն, դիաբետոլոգիայի նորություններ, հանրային առողջապահություն և որակի ապահովում, «Գիտական վերապատրաստում և կարիերայի զարգացում», «Առողջապահության մասնագետները հանուն` Հայաստանն առանց ծխախոտի» թեմաներով։ Համագումարի կազմակերպիչներն անցկացրեցին նաև հեռուստակամուրջ` մանկական սրտաբանության, Նյու Ջերսիի «Սան Ջոզեֆ» մանկական հիվանդանոցի պրոֆեսոր Ջոն Մեսսինայի դասախոսությամբ։

Բժշկական համագումարի ժամանակ սկիզբ դրվեց մեկ այլ` բավականին խոստումնալից նախագծի` «Կամուրջների կառուցում» գործընկերության ծրագրի, որը նպատակ ունի խթանելու մասնագիտական զարգացումը և երկրների միջև համագործակցությունը։
Համագումարի բացման արարողությանը ողջույնի խոսքով հանդես եկան Բժշկական համագումարի նախագահ, պրոֆեսոր Ա.Բաբլոյանը, ՀՀ առաջին տիկին Բ. Քոչարյանը, ՀՀ առողջապահության նախարար, պրոֆեսոր Հ. Քուշկյանը, Հայ բժշկական համաշխարհային վարչության նախագահ ժան Առաքելյանը։ Իր օրհնությունը համագումարին ոււղղեց Ն.Ս.Օ.Տ.Տ. Ամենայն Հայոց Կաթողիկոս Գարեգին II, որի ջերմ ուղերձն ընթերցվեց բացման արարողության ժամանակ։

Համագումարի լիագումար նիստերին ներկայացվեցին համաշխարհային ճանաչում ունեցող պրոֆեսորներ Արամ Չոբանյանի, Ջոն Բիլեզիկյանի, Հարություն Արմենյանի, Գրեգորի Կոննոլիի և Հակոբ Ակիսկալի դասախոսությունները, որոնք մեծ հետաքրքրություն առաջացրեցին համագումարի մասնակիցների մոտ։ Դասախոսությունները նվիրված էին հիպերտենզիայի, օսթեոպորոզի, առողջապահության ոլորտում որակի ապահովման, ծխախոտի դեմ պայքարի և հոգեկան առողջության խնդիրներին։

Հայաստանի Հանրապետությանը և Լեռանային Ղարաբաղի Հանրապետությանը վերաբերող առողջապահական կարևոր հարցերին նվիրված լիակազմ նիստերից բացի, տեղի ունեցան բժշկության 22 ոլորտ ընդգրկող առանձին գիտական նիստեր, որոնց ընթացքում շուրջ 155 զեկուցումներով հանդես եկան Հայաստանի և սփյուռքի մասնագետները, որոնք ներկայացրեցին իրենց աշխատանքի արդյունքները, բժշկական ոլորտի նորությունները և բուժման առաջադեմ եղանակները։

Հունիսի 30-ի լիագումար նիստին ներկայացվեցին Հայաստան-սփյուռք համագործակցության ծրագրերը, այնուհետ տեղի ունեցավ ռազմավարական պլանավորման նիստը՝ նվիրված համագործակցության հետագա զարգացմանը, որին մասնակցեցին ՀՀ արտաքին գործերի նախարար Վարդան Օսկանյանը և ՀՀ առողջապահության նախարար Հարություն Քուշկյանը։

Կարծում ենք, որ այս գերհագեցած երեք օրերեը մեծագույն լիցք կհաղորդեն ինչպես Հայաստանի, այնպես էլ սփյուռքի մեր գործընկերներին, որոնց նորանոր հաջողություններին ինչպես գիտական, այնպես էլ գործնական բժշկության ասպարեզում հնարավորություն կունենանք ծանոթանալ 2009 թ. Նյու Յորքում` Հայ բժիշկների X համագումարում։

Անցած Համագումարի մասին կարծիքների փոխանակման և հետագա համագումարների կազմակերպման բարելավման ակնկալիքով կազմկոմիտեն մշակել է հարցաշար, որը տեղադրվել է www.2imca.am ինտերնետային կայքում, որտեղ կարող եք գտնել նաև միջոցառման լուսանկարների պատկերաշարը։

Հարցեր, պատասխաններ, մեկնաբանություններ